Եղիշե Մելիքյանը նշանակվել է «Ալաշկերտի» գլխավոր մարզիչ

Հունիսի 28-ի «Նոայի» հետ խաղից (0:1) հետո փոփոխություն է տեղի ունեցել ՀՀեռեակի չեմպիոն Երևանի «Ալաշկերտի» մարզչական շտաբում:
Ինչպես հայտնում են երևանյան ակումբի մամուլի ծառայությունից, «Ալաշկերտի» գլխավոր մարզիչ է նշանակվել Հայաստանի ազգային հավաքականի նախկին ֆուտբոլիստ, փորձառու մասնագետ,40-ամյա Եղիշե Մելիքյանը:
Ֆուտբոլիստի կարիերայի ընթացքում Մելիքյանը հանդես է եկել հայկական մի շարք ակումբներում` դառնալով Հայաստանի չեմպիոն, գավաթակիր և մեդալակիր, հաջողությամբ ներկայացրել է Ուկրաինայի «Մետալուրգ» (Դոնեցկ), «Ստալ», «Զարյա», «Կրիմտեպլիցա» և «Գովերլա» թիմերը: Դոնեցկը ներկայացնող ակումբի կազմում դարձել է Ուկրաինայի առաջնության բրոնզե մեդալակիր:
Հայաստանի ազգային հավաքականի կազմում ձախ եզրայինի դիրքում հանդես եկած Եղիշե Մելիքյանը անցկացրել է 30 հանդիպում:
2015թ-ին մարզչական կարիերան սկսած Եղիշե Մելիքյանը 5 տարի աշխատել է ուկրաինական ակումբներում:
«Ալաշկերտի» նոր գլխավոր մարզիչն աշխատել է Դոնեցկի «Մետալուրգի» Մ-19 և Մ-21 թիմերում, գլխավորել է «Ստալի» Մ-19 և Մ-21 թիմերը: 2017-ին Մելիքյանը գլխավորել է «Ստալի» գլխավոր թիմը:
2019 թվականի սեպտեմբերից 40-ամյա մասնագետն ընդգրկված էր «Լվովի» մարզչական շտաբում, իսկ նույն տարվա հոկտեմբերին գլխավորեց Ուկրաինայի Պրեմիեր լիգայում հանդես եկող ակումբը` կարճ ժամանակահատվածում բարելավելով թիմի խաղը և դիրքը մրցաշարային աղյուսակում: Հայ մասնագետն օրեր առաջ սեփական նախաձեռնությամբ լքել էր «Լվովի» գլխավոր մարզիչի պաշտոնը:
Եղիշե Մելիքյանն ունի ՈՒԵՖԱ-ի մարզչական PRO կարգի արտոնագիր, համակարգում էր Ուկրաինայի ֆուտբոլի ֆեդերացիայի կողմից կազմակերպվող PRO արտոնագրի դասընթացները:
Հաջողություն և բեղմնավոր աշխատանք ենք մաղթում Եղիշե Մելիքյանին «Ալաշկերտի» գլխավոր մարզիչի պաշտոնում: