![](https://armenian-soccer.com/wp-content/uploads/2023/06/ART_9431-1024x683.jpg)
Հունիսի 3-ին, Radison Blu հյուրանոցի դահլիճում տեղի ունեցավ Armenian Soccer ֆուտբոլային կայքի 9-րդ ամենամյա մրցանակաբաշխությունը։
Երեկոյին ներկա էր հայկական ֆուտբոլային աշխարհի ամբողջ ներկապնակը՝ ֆուտբոլիստներ, մարզիչներ, ակումբների աշխատակիցներ, ֆուտբոլի ֆեդերացիայի ներկայացուցիչներ, լրագրողներ՝ բոլոր այն մարդիկ, ում շնորհիվ այսօր ունենք ֆուտբոլն իր այս տեսքով:
Միջոցառման սկզբում ողջունի խոսքով հանդես եկան Armenian Soccer կայքի հիմնադիր Էդգար Պետրոսյանն ու Fastex-ի ներկայացուցիչ Կարեն Ռաֆայելյանը։
![](https://armenian-soccer.com/wp-content/uploads/2023/06/ART_9504-1024x683.jpg)
Նշենք, որ մրցանակաբաշխության ընթացքում պարգևատրվում են արդեն կայացած քվեարկությամբ ընտրված, Հայաստանի առաջնության լավագույն ֆուտբոլիստներն ու մարզիչները։
Այս տարի ունեինք նաև նոր անվանակարգ, որն էր` ՀՊԼ լավագույն մեկնաբան։ Դե իսկ պատվավոր այս կոչմանն արժանացավ լրագրող, VivaroMedia-ի մեկնաբան Արման Աբելյանը։ Արմանին մրցանակը հանձնեց լեգենդար, բազմափորձ ու բոլորի համար սիրելի Սուրեն Բաղդասարյանը։
Վերջինս ընդգծեց, որ շատ հաճելի է, երբ կարևորվում է նաև մեկնաբանի աշխատանքը։
![](https://armenian-soccer.com/wp-content/uploads/2023/06/ART_9536-1024x683.jpg)
«Լավագույն դարպասապահ» ճանաչվեց Հայաստանի նորընծա չեմպիոն «Ուրարտուի» ռուսաստանցի դարպասապահ Ալեքսանդր Մելիխովը։ Ալեքսանդրն այս մրցաշրջանում շատ անգամներ է փրկել իր թիմին վերահաս գոլերից ու պարտություններից։
Նրան մրցանակը հանձնեց ՀՖՖ գործկոմի անդամ, «Արարատ» ֆուտբոլային ակումբի գործադիր տնօրեն Տիգրան Ղարաբաղցյանը։
![](https://armenian-soccer.com/wp-content/uploads/2023/06/ART_9563-1024x683.jpg)
«Լավագույն պաշտպանը» ևս «Ուրարտուից» է` թիմի ավագ Ժիրայր Մարգարյանը։ Հայաստանի հավաքականի ֆուտբոլիստը հիանալի է մրցաշրջան է անցկացնել ու դեպի չեմպիոնություն տարել իր թիմին։ Վերջինիս իր մրցանակը հանձնեց ՀՖՖ գործկոմի անդամ, Sport-life կայքի խմբագիր Գոհար Նավասարդյանը։
![](https://armenian-soccer.com/wp-content/uploads/2023/06/ART_9569.jpg)
«Լավագույն կիսապաշտպան» կոչմանն արժանացել է արդեն նախկին չեմպիոն «Փյունիկի» ունիվերսալ ֆուտբոլիստ Արտակ Դաշյանը։ Արտակն այս մրցաշրջանում նորովի է բացահայտել իրեն ու հատկապես եվրագավաթային մրցաշարերում իր ֆանտաստիկ խաղով հմայել ֆուտբոլասերներին։
Դաշյանին իր մրցանակը հանձնեց «Շիրակի» գլխավոր մարզիչ Էդգար Թորոսյանը։
![](https://armenian-soccer.com/wp-content/uploads/2023/06/ART_9579-1024x683.jpg)
Հերթը «Լավագույն հարձակվողինն» է, որը նույնպես «Փյունիկից» է։ Այս կոչմանն արժանացել է Լուկա Յուրիչիչը, որը կարճ ժամանակում աչքի է ընկել իր հետաքրքիր խաղաոճով ու խփած գոլերով։ Վերջինս հավակնում է նաև ՀՊԼ-ի 2022/23թթ. մրցաշրջանի լավագույն ռմբարկուի կոչմանը։
Լուկային մրցանակը հանձնեց ՀՖՖ գործկոմի անդամ, «Նոա» ֆուտբոլային ակումբի գործադիր տնօրեն Արթուր Սահակյանը։
![](https://armenian-soccer.com/wp-content/uploads/2023/06/ART_9591-1024x683.jpg)
Դիրքային խաղացողներից հետո իրենց մրցանակները ստացան արդեն ավարտվող մրցաշրջանի ընթացքում գրանցված լավագույն 3 գոլերի հեղինակները։
Պատվավոր 3-րդ տեղը զբաղեցրել է 26-րդ տուրի «Նոա»-«Շիրակ» խաղում Ռուբեն Եսայանի խփած գոլը։
Թերևս երեկոյի ամենահուզիչ պահերից մեկն էր, քանի որ Ռուբենին իր մրցանակը հանձնում էր հայրը` «Նոայի» գլխավոր մարզիչ Տիգրան Եսայանը։
![](https://armenian-soccer.com/wp-content/uploads/2023/06/ART_9627-1024x683.jpg)
2-րդ տեղում 33-րդ տուրի «Արարատ-Արմենիա»- «Վան» խաղում գրանցված` Հակոբ Հակոբյանի գոլն էր։
Նրան իր մրցանակը հանձնեց «Վանի» ֆուտբոլիստ, StreetballArmenia-ի հիմնադիր Դավիթ Մանոյանը։
![](https://armenian-soccer.com/wp-content/uploads/2023/06/ART_9647-1024x683.jpg)
Եվ իհարկե մրցաշրջանի լավագույն գոլը… պատվավոր առաջին հորիզոնականում 28-րդ տուրի «Ուրարտու»-«Արարատ-Արմենիա» խաղում Արաս Օզբիլիսի խփած գնդակն էր, որն ուղղակի ֆանտաստիկ էր։
![](https://armenian-soccer.com/wp-content/uploads/2023/06/ART_9659-1024x683.jpg)
Արասին իր մրցանակը պետք է հանձներ «Ուրարտուի» («Բանանց») նախկին ֆուտբոլիստ Արամ Հակոբյանը, սակայն վերջինս ներկա չէր և այդ մեծ պատվին արժանացավ Armenian Soccer կայքի լրագրող Լիանա Հարությունյանը։
Ֆուտբոլիստների հետ ամեն բան պարզ է, ժամանակն է ներկայացնելու «Լավագույն մարզչին», որի կոչմանն էլ արդեն 2-րդ տարին անընդմեջ արժանացավ «Փյունիկի» գլխավոր մարզիչ Եղիշե Մելիքյանը։
Մասնագետի գլխավորությամբ նախկին չեմպիոնն այս տարի էլ շարունակեց զարմացնել մեզ և սպասում ենք նույնը եվրագավաթային առաջիկա մրցաշարերում։
![](https://armenian-soccer.com/wp-content/uploads/2023/06/ART_9685-1024x683.jpg)
Մելիքյանին իր մրցանակը հանձնեց Հայաստանի ազգային հավաքականում նրա խաղընկեր, երիտասարդական հավաքականները նախկինում մարզած և ՀՖՖ Տեխնիկական Կենտրոնի սպորտային տնօրեն Արթուր Ոսկանյանը:
Հերթական անգամ Armenian Soccer-ի վարկածով «Լավագույն հայ ֆուտբոլիստ» է ճանաչվում Միլանի «Ինտերի» կիսապաշտպան, Հայաստանի հավաքականի նախկին առաջատար Հենրիխ Մխիթարյանը։
Հենրիխն անգամ այս տարիքում չի դադարում աճ գրանցել ու շարունակում է իր նվաճումներով հպարտությամբ լցնել մեզ։
Ընդամենը մի քանի օրից Մխիթարյանը Ստամբուլում կմասնակցի Չեմպիոնների լիգայի եզրափակչին, այսպիսով նա կլինի առաջին հայ ֆուտբոլիստը, որը կխաղա եվրոպական ամենահեղինակավոր մրցաշարի գլխավոր խաղում և հուսանք, որ նաև կլինի առաջինը, որը կհաղթի եզրափակչում։
![](https://armenian-soccer.com/wp-content/uploads/2023/06/ART_9740.jpg)
Քանի որ հարգելի պատճառներով Մխիթարյանը երեկոյին ներկա չէր, իր մրցանակը կհանձնվի ավելի ուշ։
Իսկ Մխիթարյանի մասին գեղեցիկ խոսք ասաց «Ուրարտու» ակումբի կոմերցիոն հարցերով փոխտնօրեն Դավիթ Մարտիրոսյանը։
Հարկ է նշել, որ մեր բոլոր մրցանակակիրները բացի պարգևներից Fastex-ի կողմից ստացան token-ներ, իսկ «Արարատ» հայկական կոնյակների կողմից անվանական կոնյակներ։
![](https://armenian-soccer.com/wp-content/uploads/2023/06/ART_9762-1024x683.jpg)
Եվ ահա այսպես էլ ավարտվեց Armenian Soccer կայքի հերթական մրցանակաբաշխությունը, որն ամեն տարի համախմբում է ամենասիրելի ու տարածված սպորտաձևի` ֆուտբոլի ներկայացուցիչներին։
Վերջում հիշեցնենք, որ մրցանակաբաշխությունն անցկացվեց Fastex-ի և «Արարատ» հայկական կոնյակների աջակցությամբ։
Առջևում հոբելյանական 10-րդ մրցանակաբաշխությունն է, ինչն ավելի է պարտավորեցնում մեզ ամեն օր աշխատել հոգուտ հայկական ֆուտբոլի զարգացման ու տարածման։
© Armenian Soccer 2023