ՀՊԼ. Գոլառատ խաղում «Նոան» ու «Շիրակը» չպարզեցին հաղթողին

Fastex Հայաստանի պրեմիեր լիգայի 26-րդ տուրում մրցեցին «Նոան» ու «Շիրակը»:

Խաղը դրամատիկ ընթացք ունեցավ ու ավարտվեց ոչ-ոքի` 3:3 հաշվով։

Մինչև առաջին խաղակեսի վերջնամասը տանտերերը հաղթում էին 2:0 հաշվով. գոլի հեղինակներ էին դարձել Ալեքսանդր Լյովեն ու Ռուբեն-Տիգրան Եսայանը։

Սակայն խաղի առաջին կեսին ավելացված 5-րդ րոպեին անվրեպ իրացնելով 11-մետրանոց հարվածը, «Շիրակից» գոլի հեղինակ դարձավ Մուսա Բակայոկոն։

64-րդ րոպեին հուժկու հարվածով հաշիվը հավասարեցրեց Ռաֆիկ Միսակյանը։ Այնուհետև շիրակցիները կարողացան նաև առաջ անցնել հաշվի մեջ` ինքնագոլի հեղինակ դարձավ Երջանիկ Ղուբասարյանը։

Խաղն ավելի թեժացավ։ «Նոան» չհանձնվեց և հանդիման հիմնական ժամանակին ավելացված 4-րդ րոպեին Յոն Սեն Կիմի գոլի շնորհիվ խուսափեց պարտությունից։

Այս խաղից հետո «Շիրակը» վաստակեց 28 միավոր և հավասարվելով «Արարատին», բաժանում է նրա հետ 5-6-րդ տեղերը։

«Նոան» 19 միավորով 9-րդն է։