«Հաղթելու մեծ շանսեր ունենք». Եղիշե Մելիքյան

Կոնֆերենցիաների լիգայի որակավորման մեկնարկային տուրի առաջին խաղում «Փյունիկը» կմրցի էստոնական «Նարվա Տրանսի» հետ։

Հանդիպման նախախաղային ասուլիսի ժամանակ փոխչեմպիոնի գլխավոր մարզիչ Եղիշե Մելիքյանն անդրադարձել է թիմի նախապատրաստությանը, սելեկցիային ու գնահատել «Փյունիկի» հաղթելու շանսերն առաջիկա խաղում։

«Լավ պատրաստվել ենք «Նարվա Տրանսի» դեմ խաղին, ուսումնասիրել ենք մրցակցին: Նախապատրաստվելու համար բավականին ժամանակ ունեինք, լավ աշխատանք ենք տարել: Ֆուտբոլիստները մարտական են տրամադրված, կա վստահություն: Պետք է լուրջ մոտենանք խաղին, քանի որ վտանգավոր մրցակից ունենք։ Նոր գլխավոր մարզիչ ունեն, դիտել ենք նրանց անցկացրած վերջին 5 խաղերը:

Գոհ չեմ ակումբի սելեկցիոն աշխատանքից, բայց մեղավորներից մեկը ես եմ: Կարող էինք ավելի ուժեղ կազմ ունենալ, բայց սա էլ վատը չէ:

Ինչ վերաբերում է Լուկա Յուրիչիչի ապագային, ապա հստակ բան չեմ կարող ասել, քանի որ տրանսֆերային պատուհանը դեռ բաց է: Իսկ մեր նորեկներ դեռ պետք է հարմարվեն թիմին։

Հաղթելու մեծ շանսեր ունենք «Նարվա Տրանսի» դեմ խաղում, եթե ստացվի իրագործել մեր պատրաստած ծրագիրը»։

«Փյունիկ» — «Նարվա Տրանս» հանդիպումը կկայանա այսօր` հուլիսի 13-ին, Աբովյանի քաղաքային ստադիոնում և կմեկնարկի ժամը 19:00-ին:
Պատասխան խաղը տեղի կունենա մեկ շաբաթ անց Էստոնիայում: