ԱԱ2022–ի ընտրական փուլի Իսլանդիա–Հայաստան խաղի նախօրեին Ռեյկյավիկում կայացել է Հայաստանի ազգային հավաքականի գլխավոր մարզիչ Խոակին Կապառոսի մամուլի ասուլիսը։
Մարզիչը ասուլիսի ընթացքում անդրադարձել է մի շարք թեմաների, որոնք կարճ ներկայացնում ենք ստորև:
Լուկաս Սելարայանի մասին
Ամենակարևորն այն է, որ նա մեծ խանդավառությամբ է եկել: Բավականին երկար ժամանակ է՝ ֆեդերացիան ջանքեր էր գործադրում, որ նա հավաքականին միանա: Սելարայանը կարող է իր փորձը փոխանցել հավաքականին, ինչը շատ կարևոր է, սակայն ֆուտբոլում պետք է բոլորը աշխատեն, որ թիմը հաջողություն ունենա: Այնպես որ, մենք չենք պատրաստվում Լուկասին դնել ճնշման տակ:
Կադրերի մասին
Ժիրայր Մարգարյանն ու Ալիկ Առաքելյանը բարձր մակարդակի ֆուտբոլ են խաղում ու իրենց թիմի մեկնարկային կազմի խաղացողներ են: Քանիցս ասել ենք, որ հավաքականի դռները բաց են բոլոր ֆուտբոլիստների առաջ: Եթե տեսնենք, որ ինչ-որ մեկը լավ մարզավիճակում է, ապա անպայման կհրավիրենք:
Ինչ վերաբերում է Բիչախչյանի բացակայությանն, ապա նա լավ ֆուտբոլիստ է, ու մենք շարունակում ենք մեծ հույսեր կապել նրա հետ, բայց այս դիրքում մենք ունենք Մխիթարյան, Սպերցյան, Սելարայան, Վարդանյան:
Նույնիսկ Ադամյանը կարող է խաղալ այդ դիրքում և բոլորին չենք կարող հրավիրել հավաքական:
Իսլանդիայի հավաքականի մասին
Իսլանդիայի հավաքականը լիովին նվիրվում է խաղին: Այս հավաքականի որակները երևացին հենց առաջին խաղում: Սակայն եթե մենք լինենք մեր բարձրության վրա, ու մարզական բախտն էլ մեզ հետ լինի, կարող ենք հասնել հաջողության:
Թիմի մթնոլորտի մասին
Թիմում գերազանց մթնոլորտ է: Դա մեր ուժեղ կողմերից է: Մենք հասկանում ենք, որ կան հավաքականներ, որոնք մեզանից բարձր են, բայց այս առումով մեզ ոչ ոք չի կարող հաղթել:
©2021 Armenian Soccer