Հայաստանի ազգային հավաքականի դարպասապահ Օգնյեն Չանչարևիչը Լատվիայի դեմ արտագնա խաղից առաջ տեղի ունեցած մամուլի ասուլիսում պատասխանել է լրագրողների հարցերին:
«Բոլորը գիտեն, որ Ֆարերյան կղզիների հավաքականից կրած տնային պարտությունը ծանր հարված էր մեզ համար։ Բայց, մյուս կողմից, լավ է, որ Լատվիայի դեմ հանդիպումը կայանալու է դրանից ընդամենը երեք օր անց։ Ամեն ինչ կանենք մեր երկրպագուներին կրկին գոհացնելու համար։
Մենք՝ ազգային հավաքականի ավելի փորձառու խաղացողներս, միշտ փորձում ենք աջակցել երիտասարդներին։ Պետք է հասկանալ, որ ֆուտբոլը բաղկացած է բազմաթիվ մանր սխալներից։ Մենք միշտ նրանց կողքին ենք, քանի որ երիտասարդությունը հայկական ֆուտբոլի ապագան է:
Ինչպես գիտեք՝ Հս. Մակեդոնիայի ընտրանու հետ երկու խաղերում մենք փաստացի կորցրինք 1-ին տեղը գրավելու հնարավորությունը, իսկ ֆարերներին հաղթելու դեպքում ունեինք գոնե 2-րդ տեղ զբաղեցնելու հնարավորություն: Բայց ֆուտբոլում այսպիսի բաներ երբեմն պատահում են: Վաղվա խաղում նաև մեր երկրպագուների աջակցությամբ կփորձենք անպայման հաղթել»,- ասել է Չանչարևիչը:
© Armenian Soccer 2024