Արտակ Գրիգորյանը հեռացավ «Ալաշկերտից»

«Ալաշկերտը» և թիմի կիսապաշտպան Արտակ Գրիգորյանը չեն երկարաձգել պայմանագրի ժամկետը: Այս մասին հայտնում է ակումբի մամուլի ծառայությունը։

35-ամյա ֆուտբոլիստը 2015-ից էր պաշտպանում «Ալաշկերտի» գույները և երկար տարիներ հանդիսացել է թիմի ավագը։

«Ալաշկերտի» հետ Արտակը 4 անգամ դարձել է Հայաստանի չեմպիոն, մեկ անգամ նվաճել երկրի գավաթն ու 2 անգամ էլ` սուպերգավաթը։

«Ալաշկերտը» շնորհակալություն է հայտնել Արտակ Գրիգորյանին նվիրվածության և հսկայական աշխատանքի համար ու հաջողություն մաղթել փորձառու ֆուտբոլիստին հետագա կարիերայում:

«Շնորհակալ եմ իմ հարազատ ակումբին տպավորիչ ժամանակաշրջանի համար: Միասին մեծ հաջողությունների ենք հասել:

Հաջողություն եմ մաղթում «Ալաշկերտին» նոր մրցաշրջանում: Այս թիմը յուրահատուկ տեղ է զբաղեցնում իմ սրտում»,- ասել է Արտակ Գրիգորյանը:

Նշենք, որ ըստ որոշ տեղեկությունների, Արտակ Գրիգորյանը կարող է կարիերան շարունակել «Փյունիկում»: