Պաշտոնական. Արամ Ոսկանյանը հեռացավ «Ալաշկերտից»

Արամ Ոսկանյանը լքել է «Ալաշկերտի» գլխավոր մարզչի պաշտոնը։ Այս մասին հայտնում է ակումբի մամուլի ծառայությունը։

««Ալաշկերտ» — «Նոա» (0:2) խաղից հետո հրաժարական է տվել մեր թիմի գլխավոր մարզիչ Արամ Ոսկանյանը, որի հետ միասին մարզչական շտաբից հեռացել են նաև Մանուկ Սարգսյանը և Հայկ Ոսկանյանը:

«Վան» — «Ալաշկերտ» (0:1) խաղում մեր թիմի նորանշանակ գլխավոր մարզչի պարտականությունները կատարում էր Արմեն Պետրոսյանը, որի մարզչական շտաբում ընդգրկված են Սերգեյ Էրզրումյանը և Արմեն Կիրակոսյանը»,- ասված է մամուլի հաղորդագրության մեջ։

««Նոայի» հետ խաղից հետո հանդիպում ունեցա ակումբի նախագահ Բագրատ Նավոյանի հետ:

Եկանք այն եզրահանգմանը, որ ստեղծված իրավիճակում մարզչական շտաբում փոփոխություններ են անհրաժեշտ: Որոշեցի հրաժարական տալ:

Հաջողություններ եմ մաղթում ինձ համար հարազատ ակումբին՝ առաջիկա կարևոր խաղերում»,- ակումբի մամուլի ծառայության հետ զրույցում նշել է Արամ Ոսկանյանը:

«Ալաշկերտ» ֆուտբոլային ակումբը շնորհակալություն է հայտնել պարոն Ոսկանյանին և իր օգնականներին՝ կատարած աշխատանքի համար և հաջողություն մաղթել մարզիչներին հետագա կարիերայում: