Կոնֆերենցիաների լիգայի որակավորման առաջին փուլում «Ուրարտուն» հուլիսի 18-ին սեփական հարկի տակ կհյուրընկալի «Կալևին»: Խաղին ընդառաջ կայացել է թիմի գլխավոր մարզիչ Դմիտրի Գունկոյի մամուլի ասուլիսը:
Հիշեցնենք՝ առաջին խաղում երևանյան թիմը 2:1 հաշվով կամային հաղթանակ է տարել:
«Նոր խաղացողների ադապտացիոն գործընթացը շարունակվում է: Անկասկած, պետք է խաղալ, ամրապնդել կապերը, ժամանակը քիչ է, բայց մենք դրա համար ամեն ինչ անում ենք: Յուրաքանչյուր խաղից առաջ մեր առջև դնում ենք ամենամեծ խնդիրները, ճնշումներ միշտ կան, բայց մենք ցանկանում ենք հնարավորինս շատ առաջ գնալ, և առաջին խաղում գրանցած հաղթանակը հոգեբանորեն շատ կարևոր էր թիմի համար, պետք է շարունակել նույն ոգով։ Ես ցանկանում եմ, որ վաղը տրիբունաները լինեն լեփ-լեցուն»,- ասել է Գունկոն:
Ռուս ֆուտբոլիստների՝ վիզա չստանալու մասին
«Հասկանում էինք, որ այդպիսի բան հնարավոր է լինի, ուստի կազմի ընտրության հարցում փորձել էինք դա հաշվի առնել: Երբ հաստատվեց, որ նրանք չեն մասնակցելու, դաշտ դուրս բերեցինք ամենախաղակցված կազմը: Արդյունքն ինքներդ տեսաք: Վաղը մեզ շատ կարևոր խաղ է սպասվում, որին լրջորեն ենք տրամադրվել: Ներդրել ենք բոլոր ուժերն ու պատրաստվում ենք»:
Հայ երիտասարդ խաղացողների մասին
«Թե՛ ակումբի նախագահը, թե՛ ես հպարտ ենք մեր ակադեմիայով ու սաներով: Հայկական ֆուտբոլի համար իսկապես կարևոր պահ է՝ հնարավորություն ունենալ տեսնելու հայ խաղացողներին, այնպես անել, որ նրանք հավատան իրենց ուժերին միջազգային մակարդակում: Պետք է տեսնեիք՝ նրանք ինչ էմոցիաներ ունեին»:
© Armenian Soccer 2024