Armenian Soccer
Armenian Soccer

Մեր ամենամեծ նպատակը հայ երեխաների համար ճանապարհ բացելն է. Հայկ Հովակիմյան

Հայկ Հովակիմյան

 

Այս ամռանը «Նոա Հոլդինգը» հայտարարեց նոր ակումբի ձեռքբերման մասին։

Հերթական ակումբը, որը միացավ «Նոա» ընտանիքին` հունգարական «Դեբրեցենն» էր։

 

«Նոայի» ներկայացուցիչներից Հայկ Հովակիմյանը, որը զբաղեցնում է Հունգարիան ներկայացնող ակումբի մարզական տնօրենի պաշտոնը, մեզ հետ զրույցում պատմել է, թե ինչպես է սկսել համագործակցությունը, ինչ նպատակ է հետապնդում տարբեր ակումբների ձեռքբերումն ու ամենակարևորը, որքանով այն կնպաստի մեր մանկապատանեկան ֆուտբոլի զարգացմանը։

 

«Նախ և առաջ մեզ համար շատ կարևոր է, որ մեր սկսած պրոյեկտն ունենա ապագա և մեծ պոտենցիալ։

Երկար ենք ուսումնասիրել «Դեբրեցենը». հիանալի ստադիոն ունեն, ակադեմիան հիասքանչ է, 400-ից ավելի երեխաներ են այնտեղ մարզվում։

Մ-14/Մ-15 տարիքայինների թիմերում անգամ հավաքականում հանդես եկող ֆուտբոլիստներ կան։

Կարծում եմ այստեղից հնարավոր է մեծ քայլ անել դեպի եվրոպական գրանդներ»:

 

Հարցին, թե սպասվում են արդյոք փորձի փոխանակման ծրագրեր, Հովակիմյանը հավաստիացրեց, որ առաջիկայում անպայման կլինեն։

 

«Մեր ամենամեծ նպատակն է հայ երեխաների համար ճանապարհ բացելը։

«Նոայից» կլինեն ֆուտբոլիստներ, որոնք լավ ֆուտբոլային որակներ ունենալու դեպքում անպայման հնարավորություն կստանան «Դեբրեցենում» հայտնվելու։

Այժմ ակումբի 2-րդ թիմում ունենք հայ ֆուտբոլիստ` Շվեյցարիայից Էրիկ Տեր-Մկրտչյանը, որը փորձաշրջանի ընթացքում ցույց տվեց, որ համապատասխանում է թիմին և ստացավ թիմում հանդես գալու հնարավորություն»:

 

Ինչ վերաբերում է հայկական և հունգարական ֆուտբոլների տարբերությանը, Հայկը նշեց, որ եվրոպական երկրում ֆուտբոլն ավելի լավ մակարդակի վրա է։

 

«Շատ ինտենսիվ ֆուտբոլ է այնտեղ, շատ է պայքարը։ Համեմատած մեր երկրի հետ մակարդակի տարբերությունը բավականին մեծ է։

Հունգարիայում ֆուտբոլն այժմ զարգանում է մեծ տեմպերով, նախորդ տարի ազգային հավաքականը հիանալի հանդես եկավ Ազգերի լիգայում, ներքին առաջնության թիմերն էլ լավ ելույթներ են ունենում եվրագավաթներում»:

 

Վերջում անդրադառնալով «Վիլյառեալի» հետ համագործակցությանը, «Նոայի» ներկայացուցիչը հայտնեց, որ իսպանական ակումբի հետ կհամագործակցի նաև «Դեբրեցենը»:

 

«Ինչպես մենք ենք շահագրգռված այս համագործակցությամբ, այնպես էլ «Վիլյառեալը»: Իսպանական գրանդը մեծ նպատակներ ունի այս տարածաշրջանի հետ կապված։

Որպես փոքր գաղտնիք նշեմ, որ «Դեբրեցենը» ևս համագործակցելու է «Վիլյառեալի» հետ և առաջիկայում հնարավոր է և՛ «Նոայից» և՛ «Դեբրեցենից» որոշ երեխաներ հնարավոր ստանան «Վիլյառեալի» ակադեմիայում մարզվելու»:

 

Հիշեցնենք, որ «Վիլյառեալի» հետ համագործակցության մասին «Նոան» հայտնել էր մոտ մեկ ամիս առաջ, իսկ օրեր առաջ կայացավ իսպանական ակումբի ներկայացուցիչների հետ համատեղ ասուլիս, որտեղ ներկայացվեցին համագործակցության մանրամասները։

 

©2022 Armenian Soccer